સુરતના હજીરામાં તળાવમાં ડૂબી જતાં બે સગી બહેનનાં મોત થયાં હોવાની ચકચારી ઘટના બની છે. બે સગી બહેનોનાં મોત થવાથી પરિવાર પર આભ તૂટી પડ્યું છે. તો પરિવાર સહિત સમગ્ર વિસ્તારમમાં શોકનું મોજું ફરી વળ્યું છે. આ ઘટનાની જાણ પોલીસને થતાં હજીરા પોલીસે અકસ્માત મોતનો ગુનો નોંધી બંને બહેનોના મૃતદેહને પીએમ અર્થે ખસેડી વધુ તપાસ હાથ ધરી છે.
રમતાં રમતાં નજીકના તળાવમાં બંને બહેનો ડૂબી ગઈ
સુરતમાં માતા-પિતા માટે લાલબત્તી સમાન વધુ એક ઘટના સામે આવી છે. હજીરા વિસ્તારમાં આવેલા AMNS ટાઉનશિપની અંદર આવેલા તળાવમાં એક છ વર્ષની અને નવ વર્ષની બે સગી બહેનો ડૂબી જતાં મોતને ભેટી છે. ટાઉનશિપમાં ઘર બહાર બંને બહેનો રમવા ગઈ હતી. રમતાં રમતાં નજીકના તળાવમાં બંને ડૂબી ગઈ હોવાની ઘટના બની છે.
આ બનાવ અંગેની મળતી વિગત મુજબ, ઘટનામાં છ વર્ષની રેણુપ્રિયા મહેન્દ્ર વેલાઈદમ અને નવ વર્ષની કીગુલવેની મહેન્દ્ર વેલાઈદમનું તળાવમાં ડૂબી જવાથી મોત થયું છે. બંને બાળકી ઘર નજીક રમવા ગઈ હતી. ત્યાર બાદ મોડી સાંજ સુધી ઘરે પરત ન ફરતાં પરિવાર દ્વારા બંનેની શોધખોળ કરવામાં આવી હતી. ત્યારે શોધખોળ બાદ બંને બાળાઓ AMNS કંપનીના ટાઉનશિપમાં આવેલા તળાવમાંથી મૃત હાલતમાં મળી આવી હતી.
પરિવાર અને ટાઉનશિપના સ્થાનિકો દ્વારા બંને બાળાને તળાવમાંથી બહાર કાઢી તાત્કાલિક સારવાર માટે ખાનગી હોસ્પિટલ લઈ જવામાં આવી હતી, જ્યાં ફરજ પરના તબીબોએ તેમને મૃત જાહેર કરી હતી. બંને સગી બહેનો તળાવમાં ડૂબી જવાથી મોતને ભેટતાં પરિવાર પર આભ તૂટી પડ્યું હતું. બાળકીના પિતા હજીરામાં આવેલી AMNS કંપનીમાં નોકરી કરે છે અને પત્ની બે બાળકી સાથે કંપનીના ટાઉનશિપમાં જ ઘણાં વર્ષોથી રહે છે. ત્યારે પરિવારની બંને દીકરી એકસાથે મોતને ભેટતાં પરિવાર સહિત ટાઉનશિપના સમગ્ર વિસ્તારમાં શોકનું મોજું ફરી વળ્યું હતું.
About the Author
