સુરત શહેરમાં ઝૂંપડાવાસીઓને જે તે વિસ્તારમાં આવાસ ફાળવવામાં આવ્યા હતા. જે અસરગ્રસ્તો હતા તેમને ડ્રો કરીને આવાસ ફાળવવાનું શરૂ કરાયું હતું. જેમાં ભેસ્તાન સરસ્વતી આવાસ ફાળવ્યાના ગણતરીના વર્ષોમાં જર્જરીત થયાની ફરિયાદ ઊભી થઈ હતી. ત્યારબાદ તપાસ કરવામાં આવી હતી. જેનો રિપોર્ટ જાહેર કરવા માટે આપ દ્વારા માગ કરવામાં આવી છે. આ સાથે AAPના કોર્પોરેટરે આક્ષેપો કર્યા છે કે, જો રિપોર્ટ બહાર પાડવામાં આવે તો અનેક બાબતોનો ચૂકાવનારો ખુલાસો થઈ શકે એમ છે.
તપાસ રિપોર્ટ બહાર કેમ નથી આવ્યો:
ભેસ્તાન આવાસની સ્થિતિ ગણતરીના વર્ષોમાં જ દયનીય બની હતી. અસરગ્રસ્ત ઝૂંપડાવાસીઓને મકાન તો ફાળવવામાં આવ્યા અને શાસકો દ્વારા મોટી મોટી વાતો કરવામાં આવી હતી. ખૂબ જ આધુનિક અને સુવિધા પૂર્ણ આવાસ આપવામાં આવ્યા હોવાની વાત કરવામાં આવી, પરંતુ થોડા જ સમયમાં અનેક સમસ્યાઓ સામે આવવા લાગી હતી. જેમાં પૂરતા પ્રમાણમાં પાણીની સુવિધા ન હતી, સિલિંગના પોપડાઓ ઉખાડવા માંડ્યા, સતત પાણી ટપકવાની ફરિયાદો આવતી રહી હતી. ઘણા કિસ્સાઓમાં તો સિલિંગના પોપડા નીચે પડતા નાના બાળક સહિત અનેકને ઈજા પણ થઈ હતી. જેને કારણે આવાસ ખાલી કરાવી દેવાની ફરજ પડી હતી.
તપાસ કમિટીનો રિપોર્ટ દબાવી રખાયો આ મામલે આમ આદમી પાર્ટીના કોર્પોરેટર પાયલ સાકરીયાએ જણાવ્યું હતું કે, મ્યુનિસિપલ કમિશનરને પત્ર લખીને ભેસ્તાન સરસ્વતી આવાસ બાબતનો જે રિપોર્ટ તૈયાર થયો છે, તે બહાર પાડવામાં આવે. મને શંકા છે કે, ભેસ્તાન સરસ્વતી આવાસ બનાવવામાં ખૂબ મોટો ભ્રષ્ટાચાર થયો છે. અંદાજે 9થી 10 કરોડ રૂપિયા ખર્ચ્યા બાદ પણ લોકોને સારી સુવિધા આપી શક્યા નથી. જે તે સમયે મ્યુનિસિપલ કમિશનર બંછાનિધિ પાની દ્વારા કમિટી બનાવીને ભેસ્તાન આવાસ અંગેનો રિપોર્ટ તૈયાર કરાયો હતો. તપાસ કમિટીમાં ડેપ્યુટી કમિશનર સિટી એન્જિનિયર સહિતના ત્રણ અધિકારીઓની નિમણૂક કરવામાં આવી હતી. એમના દ્વારા રિપોર્ટ કમિશનરને સોંપવામાં આવ્યો હતો.
રિપોર્ટ બહાર આવે તો અધિકારીઓની સમસ્યા વધી શકે
વધુમાં પાયલ સાકરીયા જણાવ્યું હતું કે, આ રિપોર્ટની અંદર જે તપાસમાં આવ્યું છે તે ખૂબ જ મહત્વનું છે. મને શંકા છે કે, તપાસના અંતે ભેસ્તાન આવાસની જે સ્થિતિ થઈ હતી, તેના માટે અધિકારીઓની મિલીભગત સામે આવી છે. જો રિપોર્ટ બહાર પાડવામાં આવે તો અનેક બાબતોનો ચૂકાવનારો ખુલાસો થઈ શકે એમ છે. વારંવારની રજૂઆત છતાં પણ મ્યુનિસિપલ કમિશનર અને શાસકો દ્વારા આ રિપોર્ટને બહાર પાડવામાં આવી રહ્યો નથી. જેમાં મોટું ભીનું સંકેલવામાં આવતું હોય તેવી શંકા ઉપજી રહી છે.
About the Author
