શહેરના કારેલીબાગ વિસ્તારમાં આવેલી અક્ષતા સોસાયટીમાં ભાડાના મકાનમાં રહેતાં દક્ષાબેન ચૌહાણે પોતાની બે દીકરીને ઝેરી દવા પીવડાવી અને તેમનું ગળું દબાવી મોતને ઘાટ ઉતારી હતી. બાદમાં પોતે પણ ફાંસો ખાઇ આપઘાતનો પ્રયાસ કરતાં સનસનાટી મચી ગઈ છે. આપઘાતનો પ્રયાસ કરતાં બચાવી લેવામાં આવેલી મહિલાને હોસ્પિટલમાં સારવાર આપવામાં આવી રહી છે. આ ઘટનામાં પોલીસને સુસાઇડ નોટ મળી આવી હોવાનું પણ જાણવા મળ્યું છે. આ ઘટના પાછળ આર્થિક ભીંસ કારણભૂત હોવાનું કહેવાય છે. મોટી દીકરીને એર હોસ્ટેસ બનવું હતું, જ્યારે માતા દક્ષાબેન SSG હોસ્પિટલમાં ICUમાં સારવાર હેઠળ છે.
મોટી દીકરી કોલેજમાં અને નાની ધો.9માં ભણતી
માતાના હાથે મોતને ઘાટ ઉતારાયેલી બે દીકરી પૈકી મોટી દીકરી હની ટી.વાય. બીકોમમાં અભ્યાસ કરતી હતી, જ્યારે નાની દીકરી શાલિની ધોરણ 9માં અભ્યાસ કરતી હતી. બંને દીકરીના હાથ-પગ બાંધી ઝેરી દવા પીવડાવી હતી, પરંતુ, દીકરીઓ ન મરતાં તેમનાં ગળાં દબાવી મોતને ઘાટ ઉતારી દેવામાં આવી હતી. એ બાદ માતાએ ફાંસો ખાઇ આપઘાતનો પ્રયાસ કર્યો હતો.
દક્ષાબેન સાથે અન્ય વ્યક્તિ પણ હોવાની શંકા
મળેલી માહિતી પ્રમાણે, બે દીકરીને મોતને ઘાટ ઉતારવામાં માતા દક્ષાબેન ચૌહાણ સાથે અન્ય વ્યક્તિ પણ હોવાની શક્યતાને નકારી શકાય એમ નથી. બી. 66 અક્ષતા કો. હાઉસિંગ સોસાયટીમાં ત્રણ મજલા મકાનના બીજા માળે 20 દિવસ પહેલાં દક્ષાબેન તેમની બે દીકરી સાથે ભાડે રહેવા માટે આવ્યાં હતાં.
પડોશીએ ફાંસા પરથી ઉતારી દક્ષાબેનને બે તમાચા ઝીંક્યા
મળેલી માહિતી મુજબ, વહેલી સવારે 6 વાગ્યાના સુમારે દક્ષાબેનના ઉપરના માળે ભાડે રહેતી એક છોકરીએ એક યુવાનને દક્ષાબેનના ઘરમાંથી નીકળતા જોયો હતો. તેમણે ચોર સમજી બુમરાણ મચાવી હતી. દરમિયાન યુવતી દક્ષાબેનના ઘરમાં તપાસ કરવા જતાં તેણે દક્ષાબેનને ફાંસો ખાધેલી હાલતમાં જોતાં તેમને ઉતારી બે લાફા પણ ઝીંકી દીધા હોવાનું જાણવા મળ્યું હતું.
દક્ષાબેને છેલ્લો ફોન ફોઈની દીકરીને કર્યો હતો
દક્ષાબેને છેલ્લો ફોન ફોઈની દીકરી નીલમ મકવાણાને કર્યો હતો. આજે ઘટનાની જાણ થતાં નીલમ અમદાવાદથી વડોદરા દોડી આવી હતી. તેમણે જણાવ્યું હતું કે દક્ષાબેને મને રાતે ફોન કર્યો હતો અને કહ્યું હતું કે, શું કરે છે, આથી મેં કહ્યું, ટાઇમ જો કેટલા વાગ્યા છે, શું કરતી હોઇશ. આથી દક્ષાબેને કહ્યું હતું કે મોબાઈલમાં ટાઇમ સેટ નથી એટલે ખબર નથી કેટલા વાગ્યા. નીલમે કહ્યું, રાતના ત્રણ વાગ્યા છે, આથી દક્ષાબેને કહ્યું, ઠીક છે તો સૂઇ જા. દક્ષાબેનના 15 વર્ષ પહેલાં ડિવોર્સ થઈ ગયા હતા. વિરમગામમાં સાસરું હતું. હજી થોડા સમય સુધી તો મારા મામા એટલે કે દક્ષાબેનના પિતા ભેગી જ રહેતી હતી, આથી તેને ચિંતા થતી હતી કે મારું કોણ? થોડા સમયથી જ જુદા પડીને ભાડાના મકાનમાં રહેવા ગઈ હતી.
DCP પન્નાબેન મોમાયા સ્થળ પર દોડી આવ્યાં
દરમિયાન ઘરમાં બે લાશ જોતાં યુવતીએ સોસાયટીના અન્ય લોકોને જાણ કરતાં લોકો દોડી આવ્યા હતા. બાદમાં દક્ષાબેને હોસ્પિટલમાં ખસેડવામાં આવ્યાં હતાં. એ સાથે આ બનાવની જાણ કારેલીબાગ પોલીસને કરવામાં આવતાં કાફલો સ્થળ પર દોડી આવ્યો હતો, સાથે DCP પન્નાબેન મોમાયા સ્થળ પર દોડી આવ્યાં હતાં.
દક્ષાબેન 20 દિવસ પહેલાં ભાડે રહેવા આવ્યાં હતાં
DCPએ જણાવ્યું હતું કે 20 દિવસ પહેલાં ભાડેથી રહેવા આવેલાં દક્ષાબેને પોતાની બે દીકરી હની અને શાલિનીને ઝેર આપ્યા બાદ ગળેટૂંપો આપી હત્યા કર્યા બાદ પોતે ફાંસો ખાઇ આપઘાતનો પ્રયાસ કર્યો છે. મહિલાને હોસ્પિટલમાં સારવાર માટે ખસેડવામાં આવી છે. FSLની મદદ લેવામાં આવી છે. સ્થળ પરથી ઝેરી દવાની બોટલ મળી આવી છે.
