મુંબઇ : પાલઘરનો માછીમાર ચંદ્રકાંત તરે એક જ દિવસમાં કરોડપતિ બની ગયો છે.બન્યું એવું કે ગઇ 28,ઓગસ્ટે ચંદ્રકાંત તરે માછીમારી કરવા ગયો હતો અને તેની જાળમાં ઘોળ નામની 157 માછલી પકડાઇ ગઇ હતી. ઘોળ માછલીનો ઉપયોગ તંદુરસ્તી માટે આહારમાં થતો હોવાથી તેમજ તેમાંથી શણગારની વસ્તુઓ પણ બનતી હોવાથી આ માછલી અતિ કિંમતી ગણાય છે.એટલે જ ચંદ્રકાંત તરેને એક જ દિવસમાં 1.33 કરોડ રૂપિયાની આવક થઇ હતી.
મહારાષ્ટ્રમાં ચોમાસાના ભારે વરસાદી દિવસો હોવાથી ચંદ્રકાંત તરે દરિયામાં માછીમારી માટે જઇ શક્યો નહોતો.વરસાદનું જોર ઘટતા એક મહિના બાદ ગઇ 28,ઓગસ્ટે ચંદ્રકાંત તરે તેના 10 સાથીદારો સાથે મુંબઇ-પાલઘર વચ્ચેના દરિયામાં માછીમારી કરવા ગયો હતો.તેની બોટ પાલઘરથી સમુદ્રમાં 25.5 નોટિકલ માઇલ્સ દૂર ગઇ ત્યારે ચંદ્રકાંત તરેએ તેની વિશાળ જાળ સમુદ્રમાં નાખી હતી.તેની જાળમાં ઘોળ નામની કુલ 157 માછલીઓ પકડાઇ હતી.
ઘોળ માછલીઓ લઇને ચંદ્રકાંત તરે તેના ગામ આવ્યો ત્યારે પેલી ઘોળ માછલીઓની ખરીદી માટે ઘણા વેપારીઓ ભેગા થઇ ગયા હતા.ચંદ્રકાંત તરેને એક ઘોળ માછલી દીઠ 85,000 રૂપિયા જેવી મોટી રકમ મળી હોવાનું જાણવા મળ્યું છે આમ 157 માછલીના 85 હજાર લેખે 1.33 કરોડ રૂપિયા તેને મળ્યા હતા.
આમ પાલઘરના આ માછીમારને એક જ દિવસમાં ઘોળ માછલીના વેચાણમાં 1.33 કરોડ રૂપિયાની જબરી કમાણી થઇ હોવાનું જાણવા મળે છે. સામાન્ય માછીમાર ચંદ્રકાંત તરેએ ખુશી વ્યક્ત કરતાં જણાવ્યું હતું કે સમુદ્ર દેવતાના ભરપૂર આશીર્વાદથી હવે મારી નાણાંકીય સમસ્યા દૂર થઇ જશે.
About the Author
