સુરત શહેરમાં જે પ્રકારે વસતીનું ભારણ વધ્યું છે તેની સામે વહીવટી તંત્ર દ્વારા જે સુવિધા આપવી જોઈએ તે સુવિધા હજી પણ ઉભી થતી નથી. વર્ષોથી લોકોને જાતિના દાખલા કાઢવા માટે ભારે હાલાકી ભોગવવી પડતી હોય છે. આજે સવારે જૂની બહુમાળી ઓફિસ ખાતે આવેલી સમાજ કલ્યાણ અધિકારી ઓફિસમાં લાંબી કતાર જોવા મળી હતી. મહદંશે લોકો વહેલી સવારે જ અહીં લાઈનમાં ઊભા રહી જતા હોય છે. વિદ્યાર્થીઓ પ્રવેશ દરમિયાન નોન-ક્રિમીલિયર સર્ટિફિકેટ ખૂબ જ અગત્યનું હોય છે. વિદ્યાર્થીઓ માટે આ પ્રકારની સ્થિતિ હંમેશા ઉભી થતી હોય છે. લાઈન ઉભેલા લોકો દ્વારા જાણવા મળ્યું હતું કે, એક વ્યક્તિની પ્રક્રિયા પૂર્ણ થવામાં 3 કલાક જેટલો સમય લાગી રહ્યો છે.
સરકાર દ્વારા તમામ ઓનલાઈન કરવાની વાત કરવામાં આવી રહી છે. સર્ટીફીકેટ ખૂબ જ સરળતાથી વિદ્યાર્થીઓ અને વાલીઓને મળી જાય તેના માટેની પ્રક્રિયાની વાત કરીને સરકાર પોતાની પીઠ થપથપાવતી રહે છે પરંતુ વાસ્તવિકતા કંઈક અલગ જ જોવા મળતી હોય છે. દરવર્ષે વિદ્યાર્થીઓ અને વાલીઓને આ જ રીતે કલાકો સુધી કતારમાં રહેવાની ફરજ પડે છે. સામાન્ય દિવસોમાં પણ તમે જુઓ તો સમાજ કલ્યાણ ખાતાની બહાર વિદ્યાર્થીઓ આ પ્રકારે જ કલાકો સુધી ઉભા રહેલા જોવા મળતા હોય છે. જિલ્લાના છેવાડાના ગામથી આવતા બાળકો માટે અને વાલીઓને આખો દિવસ અહીં પસાર કરવો પડે તેવી સ્થિતિ ઊભી થઈ જાય છે. પરિણામે સમયના વેડફાટ સાથે આર્થિક બોજો પણ લોકોએ સહન કરવો પડે છે.
About the Author
