પટણા હાઈકોર્ટના સાત જજોના જીપીએફ એકાઉન્ટ બંધ કરી દેવાયા
સીજેઆઈએ કહ્યું – ખરેખર આવું થયું? અમે આ મામલે શુક્રવારે સુનાવણી કરીશું
સુપ્રીમકોર્ટમાં ત્યારે સીજેઆઈની બેન્ચ સહિત તમામ લોકો અચરજ પામી ગયા જ્યારે ખબર પડી કે પટણા હાઈકોર્ટના સાત જજોના જીપીએફ એકાઉન્ટ બંધ કરી દેવાયા છે. સાતેય જજોએ આ મામલે સુપ્રીમકોર્ટમાં અરજી દાખલ કરવી પડી હતી. અરજદાર જજો તરફથી હાજર વકીલ પ્રેમ પ્રકાશે જલદી સુનાવણીની માગ કરી હતી. સીજેઆઈ ડી.વાય.ચંદ્રચૂડને જ્યારે જાણ થઈ તો તેઓ પણ ચોંકી ગયા અને કહ્યું કે ખરેખર આવું થયું? અમે આ મામલે શુક્રવારે સુનાવણી કરીશું.
કાયદા અને ન્યાય મંત્રાલયની સલાહને આધારે નિર્ણય લેવાયો
ખરેખર પટણા હાઈકોર્ટના સાત જજોએ મંગળવારે સુપ્રીમકોર્ટમાં ફરિયાદ કરી હતી કે તેમના જીપીએફ એકાઉન્ટને કાયદા અને ન્યાય મંત્રાલય દ્વારા આપવામાં આવેલા અભિપ્રાયના આધારે બિહારના એકાઉન્ટન્ટ જનરલ દ્વારા બંધ કરી દેવાયા છે. જેના લીધે તેમની પેન્શન અને અન્ય સેવાનિવૃત્તિના લાભો પર શંકાના વાદળો ઘેરાયા છે.
કયા કયા જજો છે સામેલ?
જસ્ટિસ શૈલેન્દ્ર સિંહ, જસ્ટિસ અરુણ કુમાર ઝા, જસ્ટિસ જિતેન્દ્ર કુમાર, જસ્ટિલ આલોક કુમાર પાંડે, જસ્ટિસ સુનીલ દત્તા મિશ્રા, જસ્ટિસ ચંદ્ર પ્રકાશ સિંહ અને જસ્ટિસ ચંદ્રશેખર ઝાએ આ અરજી દાખલ કરી હતી. આ જજોની એપ્રિલ 2010માં બિહારની સુપીરિયર ન્યાયિક સેવાઓ હેઠળ સીધી ભરતી તરીકે એડિશનલ જિલ્લા અને સેશન જજ તરીકે નિમણૂક કરાઈ હતી. તેમને ગત વર્ષે હાઈકોર્ટના જજો તરીકે નિમણૂક અપાઈ હતી. જ્યારે તે ન્યાયિક અધિકારી હતા ત્યારે નેશનલ પેન્શન સ્કીમનો ભાગ હતા.
મામલો શું છે?
2016માં બિહાર સરકારે એક નીતિ બનાવી હતી કે નવી પેન્શન યોજનાથી જૂની પેન્શન યોજનામાં ટ્રાન્સફર થનારા લોકો એનપીએસ યોગદાનની રકમ પાછી મેળવવા હકદાર રહેશે. તેને કાં તો તે તેમના બેન્ક ખાતામાં કે પછી જીપીએફ એકાઉન્ટમાં જમા કરી શકશે. હાઈકોર્ટના જજ બનતા તેમને એક એક જીપીએફ એકાઉન્ટ અપાયા હતા. જ્યાં તેમણે એનપીએસ યોગદાનની રકમ જમા કરાવી દીધી. ગત વર્ષે નવેમ્બરમાં આ જજો દ્વારા બિહારના એકાઉન્ટન્ટ જનરલે કાયદા અને મંત્રાલય પાસે એનપીએસ યોગદાનને જીપીએફમાં ટ્રાન્સફર કરવાની કાયદેસરતા વિશે સ્પષ્ટતા માગી હતી. મંત્રાલયના અભિપ્રાય બાદ તેમના જીપીએફ એકાઉન્ટ બંધ કરી દેવાયા હતા
About the Author
