સિંગણપોરમાં રહેતા પરિવારની 12 વર્ષની કિશોરી પર રાજસ્થાનના બાંસવાડામાં કિશોરીના ભાઈના કાકા સસરાએ બળાત્કાર ગુજારી ગર્ભવતી બનાવી હતી. પોલીસે ગુનો દાખલ કરી ઝીરો નંબરથી ગુનો બાંસવાડા ટ્રાન્સફર કર્યો છે.
સિવિલ હોસ્પિટલ અને સિંગણપોર પોલીસ સ્ટેશનમાંથી મળતી માહિતી અનુસાર, સિંગણપોર વિસ્તારમાં એક શ્રમજીવી પરિવાર રહે છે. પરિવારમાં પતિ-પત્ની ઉપરાંત એક દીકરો મનજી અને 12 વર્ષીય દીકરી કિશોરી છે. મનજી પરણેલો છે. મનજીનું સાસરિયું બાંસવાડા ખાતે છે. તેમનામાં એવો રિવાજ છે કે લગ્ન બાદ વધૂનાં માતા-પિતાને રૂપિયા આપવાના હોય, પરંતુ મનજી પાસે રૂપિયા ન હોવાથી વાયદા કરતો હતો. તેના સાસરિયાંએ કહ્યું હતું કે જો તે રૂપિયા ન આપે તો તેની નાની બહેનને સેવા માટે રાજસ્થાન મોકલે. મનજી પણ એ માટે તૈયાર થઈ ગયો હતો.
પાંચેક મહિના પહેલાં મનજીના પિતા ગામ ગયા હતા. ત્યારે મનજીએે કિશોરીને તેનાં સાસુ-સસરાની સેવા માટે રાજસ્થાન બાંસવાડા મોકલી હતી. ત્યાં કિશોરી પહોંચી તેના થોડા દિવસ બાદ મનજીના કાકા સસરાએ કિશોરી સાથે બળાત્કાર ગુજાર્યો હતો. કોઈને પણ કાંઈપણ નહીં કહેવા માટે ધમકી આપી હતી. થોડા મહિના બાદ કિશોરી સુરત આવી હતી. બે દિવસથી તેને પેટમાં દુખાવો થતો હતો, તેથી તેના પિતા સોમવારે સારવાર માટે તેને નવી સિવિલ હોસ્પિટલ લઈ આવ્યા હતા. ત્યાં ખબર પડી કે કિશોરી ગર્ભવતી છે. તેને ચાર મહિનાનો ગર્ભ છે. કિશોરીને લઈને તેનો પરિવાર સિંગણપોર પોલીસ સ્ટેશન ગયો હતો. ત્યાં ઇન્સ્પેક્ટર આર.સી.વસાવાએ મનજીના કાકા સસરા વિરુદ્ધ બળાત્કારનો ગુનો દાખલ કરીને ઝીરો નંબરથી ફરિયાદ રાજસ્થાનના બાંસવાડા પોલીસ મથકે ટ્રાન્સફર કરી દીધી છે.
About the Author
